FALALU FALKE A BIRNIN BADUN

FALALU FALKE A BIRNIN BADUN

Falalu shahararren falke da ya yi suna a ƙasar Hausa shekaru aru-aru kafin zuwan Anasara. Ya kasance mutumin Darazau ne shi. Ya kan je fatauci tun daga Darazau har sai ya dangana da Gwanja inda ya ke saro goro sannan kuma ya kai musu kayan mu na nan ƙasar zuwa can. Wannan ce sana'ar da shi ma ya gada a wajen mahaifinsa inda shi ma din ya gaje ta a wajen mahaifinsa.

Yana cikin wannan sana'a tasa da ya gada sai ya je Birnin Badun wata shekara inda ya tarar da ana wani bikin gargajiya wanda idan aka sami wamda ya yi nasara za'a aura masa ƴar sarkin garin. Saboda tsabar yarda da kan sa sai Falalu ya shiga cikin wannan gasar gaba gaɗi ba tare da ya san abokan gwabzawar sa ba ma. Ita wannan gasar dai ana haɗa kokawa ne tsakanin mutane biyu duk wanda kuma ya yi nasara shi ne zai gwabza da nagaba.

Bayan Falalu ya bayar da sunan sa ne sai ya hango wani gabjejen mutum ne abokin karawar ta sa. Falalu ya yi kamar ya janye takarar sa amma ya ji tsoron jin kunya da kuma kare martabar ƙabilar sa ta Hausa a idanun mutanen wancan garin. Haka nan ya tsaya ƴa fuskanci wannan Kutunkun ɗan damben cikin jarumta da nuna mazantaka. Da fari dai sai da ƙaton nan ya fara wasan kura da shi kafin daga bisani Allah ya bashi sa'a ya gano cewa wannan ƙaton baya son a dake shi akan agarar sa. Ai kuwa da Falalu ya gano hakan ya daga wani tsalle ya taka masa agara sai ya yi wata ƙara ya faɗi kasa wanwar ya na shure-shure.

Aka kirawo mutum nagaba nan ma ya yi nasara akan sa. Haka aka dinga yi Falalu ya na gamawa da su cikin ƙwarin gwuiwa. Daga ƙarshe aka bashi duk kyautukam da ake bawa wanda ya yi nasara da kuma amarya wato gimbiyar masarautar Birnin Badun.

Haka ya tawo da ita gida da ɗimbin dukiyar da ya samu sakakon wannan yawon fatauci nasa ga kuma amarya ga sauran kyautuka masu darajar gaske. Har yanzu zurriyar sa sana'arsu kenan kamar yanda kakannin su su ka ɗora su akai kuma su na samun cigaba da zamanantar da ita.

Ƙurunƙus!

Comments

Post a Comment

Popular posts from this blog

JUMMAI KUNYA

Image
JUMMAI KUNYA Ga ta nan ga ta nan ku! Wani yammaci wasu ƴan mata har su bakwai su ka je yin itace gefen gari. Waɗannan ƴan mata sune: Asabe, da Ladi, da Atine, da Talatu, da Larai, da Lami da kuma Jummai. Dukkannin su gidajen su maƙoftan juna ne. Bayan sun yi nisa a dawa ne har sun fara yin itace wasu ma har sun fara ɗaure na su, ai kuwa sai wani baƙin hadari ya gangamo daga gabas mai haɗe da iska. Tunda su ka ji sanyin ruwa a cikin hadarin nan su ka sha jinin jikin su cewa wannnan hadarin idan ya tsinke da ruwa sai wani ikon Ubangijin ne kawai zai tsayar da shi. Ai kuwa kafin su gama shawara ruwa mai ƙarfi ya kece. Nan fa su ka nemi wata ƙatuwar bishiyar kuka mai kogo su ka shige ciki. Bayan sun shiga kogon bishiyar kuka nan sun fake ne, kawai sai su ka dinga jin ƙasa ta na motsi. Ashe dodo ne ya zo daf da wannan bishiya ya zauna ya jingina bayansa a daidai ƙofar fita daga wannan kogon bishiyar. Nan fa wannan kogon ya ƙara yin duhu dinɗum ta inda babu mai iya ganin ko da tafin hannunta...
Read more

ƳAR BORA DA KIFANYA

Image
YAR BORA DA KIFANYA Wata yarinya ce ta taso a gidan da aka mayar da mahaifiyarta bora, duk wani aikin wahala na gidan da ita da mahaifiyarta ne su ke yin sa ga tsamgwama.ga kuma makirci. Yayinda ita kuma Mowaa da ƴaƴanta suna kwance ma ake kai musu abinci bayan an gama. Ana cikin wannan hali, wata rana sai mai gidan ya sayo kifaye daga wajen masu su mai tarin yawa. Ya na kawowa ya ajiye sai Mowa ta ce da ƴar bora cikin isa da mallaƙa "Ɗauki kifayen nan ki je rafi ki wanko mana su tatas kuma na riga na ƙirga su, idan na ga babu guda ɗaya sai na lahira ya fi ki jin daɗi" Kasancewar lokacin ɗari ne, Jikin yarinya na karkarwar saboda ɗari da kuma ta tsoron faɗan maƙetaciyar kishiyar mahaifiyarya, ta ɗebi kifi ta tafi rafi. Ta na cikin wanke kifi ne kawai sai ta ga guda ɗaya ta tashi da rai har ta na yi mata magana ta na cewa " Ƴarinya ki dubi Allah ki bar ni na je na shayar da ariraina a cikin ruwa amma na yi miki alƙaearin zan komo" Yarinyar ta saki kifanya a ckin ruwa...
Read more

Saƙa Da Zare Ɗaya

Image
Saƙa da Zare Ɗaya A tsohon birnin Kano, a wata unguwa da ƙarar shurin masaka da karafniyar allira ke tashi dare da rana, an yi wani matashi mai suna Bashir. Yana da burin ya zama gwani a harkar saƙar da ya taso yaga mutanen yankim duk suna yi. Yana son zama.cikakkem ƙwararre kamar malaminsa, Alhaji Tanko, wanda hannunsa ya shahara wajen fitar da zane mai kyau a jikin manyan riguna. Bashir ya fara koyon aikin da hanzari da kazar-kazar, amma bayan wasu watanni, sai ya fara karaya. A duk lokacin da ya kalli babban aikin da ke gabansa—yadda zai haɗa zare kala-kala, ya tsara zane, ya kuma saƙa babban gyauto.mai.ɗauke da.launuka daban-daban—sai ya ji zuciyarsa gaba ɗaya ta karaya. Yana ganin dai aikin ya fi ƙarfinsa, kuma.sam.ba zai taɓa ƙwarewa ba. Aikin yana tafiya a hankali, kuma sau da yawa yakan yi kuskuren sai an warware duk nisan da.aka yi kuwa. Wannan abu yana matuƙar bashi taƙaici. Wata rana, cikin tsananin fidda rai, ya jefar da abin da yake kan saƙawa a ƙasa ya ce wa malaminsa, ...
Read more