RIJIYAR DUDDURU DA TA AFKAU

RIJIYAR DUDDURU DA TA AFKAU

Ga ta nan ga ta nan ku!

An yi wata kyakkyawar yarinya marainiya mai suna Tamasu a garin Yalwan Tumbau. Ta na da shekaru bakwai ne mahaigiƴarta ta rasu. Kafin rasuwar mahaifiyarta sai da ta yi mata wasiƴya da cewa duk abinda za ta aikata ta fara zuwa wajen wata bishiƴar tsamiya ta tambayeta tukuna 

Mahaifiƴar yarinyar nan ta ma da kishiya mai wani irin baƙin kishi. Tunda aka auro mata marigayiyar a matsayin kishiya ta sanya mata karan tsana. Ta kasance ta na da ƴaƴa mata guda biyu sangartattu. Kai lokacin da mahaifiyar Tamasu ta haifeta ko barƙa ma ba ta iya yi mata ba duk da tsananin wahalar da ta sha a wajen naƙuda.

A na nan ana nan har Tamasu ta fara iya rarrafe. Idan ta rarrafa wajen ɗakin kishiyar mahaifiyar tata sai kawai a jiyo ta tsandara kuka. Wata rana uwar ce ke muntsininta ko mugun kallo mai tazana yara, wata rana kuma ƴaƴan na ta ne su ke yi wa Tamasu mugunta da ƙeta iri-iri. 
 A lokacin da mahaifiyar Tamasu ta fuskanci abinda ke faruwa sai su ka dinga zama a.ɗaka daga ita sai ƴar ta ƴar ƙarama.
Duk wannan halin da su ke ciki  mahaifiyar Tamasu bata taɓa ɗaga kai ta kalli kishiyarta da wani mummunan abu ba, kainhatta maingidan su ma baiɓsan halin da sunke ciki ba sai daga baya ya fara fuskanta. Ko da ya ke ma matar taɓsa dai tafi ƙarfinsa domin kuwa ko faɗa baya iya yi wa sangartattun ƴaƴanta a gabanta.

Haka yarinya Tamasu da mahaifiyarya su ka zauna cikin tsangwama da takura. Kullum su na ɗaki ba damar fitowa ko tsakar gida saboda bala'in kishiƴa da ƴaƴanta biyu. Tsangwamar yau daban ta gobe daban duk da cewa ba sa fitowa. Wasu lokutan har ƙawayensu da sauran futsararrun yara su ke gayyatowa na maƙofta domin taruwa su dinga yin jifa zuwa ɗakin mahaifiyar Tamasu.

Bayan rasuwar mahaifiyar Tamasu ne fa abubuwa su ka ƙara ta'azzara a gareta. Duk wani aikin gida ita ce ake ɗorawa ko da kuwa ƙarfinta bai kai ta yi shi ba. Kullum sai an turata ɗiɓar ruwa tsakar dare a rijiyar Afkau mai tsananin zurfi da kwazazzabai ga kuma ƙwanƙwamai duk a cikinta.

Duk sanda aka tura ta ɗebo ruwa rijiyar Afkau sai ta fara zuwa wajen bishiƴar tsamiyar nan da ake ce ta dinga yin shawara da ita ta tambayeta cikin rera wata irin waƙa mai daɗi da sanyayyar muryarta mai ɗaukar hankali ta na cewa:

Tsamiya tsamiya wajen ki na zo
Na je ni Dudduru ko na je Afkau?
Na je ni Dudduru ko na je Afkau?

Sai ita kuma tsamiyar ta ce:

Je ki Dudduru kar ki je Afkau
Afkau kisa ta ke za ta afka ki
Jeki Dudduru kar ki je Afkau
Afkau kisa ta ke za ta afka ki!"

Shi kenan yarinya sai ta je Dudduru ta ɗebo ruwan kuma ta dawo lafiya. Ana haka kullum ashe wannan abu ya na ƙara ɓatawa kishiyar uwarta rai saboda duk sanda ta komo daga ɗiban ruwan nan tsakar dare sai ta lakaɗa mata duka ta na cewa: "Ba Afkau ki ka je ba ko? Afkau na ce ki dinga zuwa ja'ira!" Ta na duka ta na ja mata kunne da ƙarfi da kuma ƙeta.

Kullum ana haka har wata rana yariman garin ya dawo daga farauta tsakar dare sai ya dinga jin ana rera wannan waƙar mai ɗaukar hankali daga can wajen bishiyar tsamiya. Ƴa na matsowa daɗin waƙar ya na ƙara bayyana. Sai ƴa laɓe ya ga abinda yarinyar nan ta aikata. Bayan ta je rijiyar Dudduru ta ɗebo ruwan ne, sai ya biyota a baya a baya har ya ga gidan su.

Washe gari Yarima ɗan sarki ya tashi da tawagar abokansa ƴaƴan manyan gari ya shirya hawa sai gidan su Tamasu. Ya na aikawa sai aka hana ta fita. Kishiyar mahaifiyarya ta aika babbar ƴar ta. Shi kuwa Yarima ya ce ba wannan ba ce. Bayan ya dage ne har da tura wasu fadawa cikin gidan aka lalubo masa Tamasunsa.

Ranar nan kishiyar uwarta da ƴaƴanta biyu ko runtsawa ba su ƴi saboda tsabar baƙin cikin. A wannan daren su ka aske gashin kan Tamasu tas su ka shafe kan da ta toka. Gashin Tamasu ya kasance ya na kaiwa har gadon bayanta, ga kyalli, ga baƙi ga kuma sheƙi. Tamasu ta sha kuka a wannan daren har sai da fuskarta ta kumbura.

Yayinda Yarima ya samu labari sai ya sanya aka kama wannan muguwar uwar da ƴaƴanta aka kai su gidan yari. Ita kuwa Tamasu ya aika tawaga da kyautukan ƙasaita zuwa wajen ƴan uwan mahaifinta aka nema masa aurenta. 

Bayan anyi auren ne Tamasu ta nemi alfarmar wajen Yarima cewa a sako ƴan uwanta biyu da mahaifiyar su. Bayan Yarima ya gama turjewa da ƙyar ya haƙura. Tamasu ta yi musu kyautuka na abin arziƙi su ka karɓa su na kuka kuma su na bata haƙuri da neman afuwar ta.
Ƙurunƙus ɗan kan ɓera!

Comments

Post a Comment

Popular posts from this blog

JUMMAI KUNYA

Image
JUMMAI KUNYA Ga ta nan ga ta nan ku! Wani yammaci wasu ƴan mata har su bakwai su ka je yin itace gefen gari. Waɗannan ƴan mata sune: Asabe, da Ladi, da Atine, da Talatu, da Larai, da Lami da kuma Jummai. Dukkannin su gidajen su maƙoftan juna ne. Bayan sun yi nisa a dawa ne har sun fara yin itace wasu ma har sun fara ɗaure na su, ai kuwa sai wani baƙin hadari ya gangamo daga gabas mai haɗe da iska. Tunda su ka ji sanyin ruwa a cikin hadarin nan su ka sha jinin jikin su cewa wannnan hadarin idan ya tsinke da ruwa sai wani ikon Ubangijin ne kawai zai tsayar da shi. Ai kuwa kafin su gama shawara ruwa mai ƙarfi ya kece. Nan fa su ka nemi wata ƙatuwar bishiyar kuka mai kogo su ka shige ciki. Bayan sun shiga kogon bishiyar kuka nan sun fake ne, kawai sai su ka dinga jin ƙasa ta na motsi. Ashe dodo ne ya zo daf da wannan bishiya ya zauna ya jingina bayansa a daidai ƙofar fita daga wannan kogon bishiyar. Nan fa wannan kogon ya ƙara yin duhu dinɗum ta inda babu mai iya ganin ko da tafin hannunta...
Read more

ƳAR BORA DA KIFANYA

Image
YAR BORA DA KIFANYA Wata yarinya ce ta taso a gidan da aka mayar da mahaifiyarta bora, duk wani aikin wahala na gidan da ita da mahaifiyarta ne su ke yin sa ga tsamgwama.ga kuma makirci. Yayinda ita kuma Mowaa da ƴaƴanta suna kwance ma ake kai musu abinci bayan an gama. Ana cikin wannan hali, wata rana sai mai gidan ya sayo kifaye daga wajen masu su mai tarin yawa. Ya na kawowa ya ajiye sai Mowa ta ce da ƴar bora cikin isa da mallaƙa "Ɗauki kifayen nan ki je rafi ki wanko mana su tatas kuma na riga na ƙirga su, idan na ga babu guda ɗaya sai na lahira ya fi ki jin daɗi" Kasancewar lokacin ɗari ne, Jikin yarinya na karkarwar saboda ɗari da kuma ta tsoron faɗan maƙetaciyar kishiyar mahaifiyarya, ta ɗebi kifi ta tafi rafi. Ta na cikin wanke kifi ne kawai sai ta ga guda ɗaya ta tashi da rai har ta na yi mata magana ta na cewa " Ƴarinya ki dubi Allah ki bar ni na je na shayar da ariraina a cikin ruwa amma na yi miki alƙaearin zan komo" Yarinyar ta saki kifanya a ckin ruwa...
Read more

Saƙa Da Zare Ɗaya

Image
Saƙa da Zare Ɗaya A tsohon birnin Kano, a wata unguwa da ƙarar shurin masaka da karafniyar allira ke tashi dare da rana, an yi wani matashi mai suna Bashir. Yana da burin ya zama gwani a harkar saƙar da ya taso yaga mutanen yankim duk suna yi. Yana son zama.cikakkem ƙwararre kamar malaminsa, Alhaji Tanko, wanda hannunsa ya shahara wajen fitar da zane mai kyau a jikin manyan riguna. Bashir ya fara koyon aikin da hanzari da kazar-kazar, amma bayan wasu watanni, sai ya fara karaya. A duk lokacin da ya kalli babban aikin da ke gabansa—yadda zai haɗa zare kala-kala, ya tsara zane, ya kuma saƙa babban gyauto.mai.ɗauke da.launuka daban-daban—sai ya ji zuciyarsa gaba ɗaya ta karaya. Yana ganin dai aikin ya fi ƙarfinsa, kuma.sam.ba zai taɓa ƙwarewa ba. Aikin yana tafiya a hankali, kuma sau da yawa yakan yi kuskuren sai an warware duk nisan da.aka yi kuwa. Wannan abu yana matuƙar bashi taƙaici. Wata rana, cikin tsananin fidda rai, ya jefar da abin da yake kan saƙawa a ƙasa ya ce wa malaminsa, ...
Read more